Baldur Smári

Rimlar hugans

2007-12-13T13:53:00.000Z

Í hádeginu í dag var mér falið það skemmtilega verkefni að lesa upp úr góðri bók fyrir matargesti í Einarshúsi hér í Bolungarvík. Ég valdi að lesa upp úr bók Einars Más Guðmundssonar, Rimlar hugans, en rithöfundurinn sat einmitt við hliðina á mér í flugvélinni á leiðinni heim frá París um daginn.

Mér finnst við hæfi að birta smá kafla úr bókinni þar sem Einar Már segir frá vini sínum Baldri sem hafði yfirgefið konu sína og börn fyrir hana Jane sem var amerískur endurskoðandi af norskum ættum.

"Jane trúði því að hún hefði verið send til Dalvíkur af yfirnáttúrulegum öflum og Baldur fékk hugljómun, yfirgaf konu og börn, og fylgdi henni eins og mormóni yfir hafið, alla leið til Ameríku. Fyrirtækið hans, Balli, sem framleiddi nuddpotta og beið eftir að vinna markaði í fjarlægum löndum, fór á hausinn, en í það hafði reyndar stefnt um hríð. En það var ekki Baldri að kenna, heldur Byggðastofnun og gott ef ekki Framsóknarflokknum sem stjórnaði Byggðastofnun einsog flestu öðru. Þannnig er það bara þegar við klúðrum hlutunum. Ekkert er okkur sjálfum að kenna."

Reyndar mættu ansi margir síðustu tvær setningarnar til sín: "Þannnig er það bara þegar við klúðrum hlutunum. Ekkert er okkur sjálfum að kenna." Mér finnst alltof lítið um að fólk líti í eigin barm og viðurkenni mistök sín, þess í stað er fólk í stöðugru afneitun og reynir að skella skuldinni á aðra.

Síðbúinn helgarskammtur

2007-12-10T14:42:00.000Z

Helgarskammturinn er aftur kominn á dagskrá. Að þessu sinni eru fimm frábær lög í boði.

1. Freemasons - Uninvited: Hinir bresku frímúrarar taka hérna gamalt lag frá Alanis Morrisette upp á sína arma... hreinasta snilld.
2. Kim Sozzi - Break Up: Þar er ljúfur Cascada ilmur af þessu lagi... DJ Manian og félagar klikka ekki.
3. Milk Inc - Sunrise: Nú liggur leiðin til Hollands þar sem Milk Inc nýtur mikilla vinsælla, Jekyll & Hyde eiga þessa mögnuðu útgáfu af Sunrise.
4. Rihanna - Don't Stop The Music: Hrikalega flott rödd í bland við krafmikið poppað diskó, einhverra hluta vegna kemur gamalt Michael Jackson lag upp í hugann á mér.
5. Scooter - The Question Is What Is The Question: Þýska vespugengið mætir hér með enn einn smellinn, eðal rafvirkjapopp fyrir alla alvöru hnakka.

Endurkoman

2007-12-10T11:41:00.000Z

Eftir margra mánaða þagnarbindindi er ég aftur farinn að skrifa niður hugleiðingar mínar hér á Blogspot. Vera mín á Moggablogginu hefur gert skrifin steingeld og stundum finnst mér eins og ég hafi týnt ástríðunni fyrir skapandi skrifum.

Tímabundinn flutningur

2007-04-21T22:18:00.000Z

Það er mikið að gera hjá mér í vinnu og einkalífi þessa dagana og því er lítið bloggað hérna megin. Þar til að vertíðinni hjá mér lýkur þetta vorið má finna fréttir af mér á vikari.blog.is

Að öðru leyti gengur lífið sinn vanagang hjá mér og ég get upplýst að ég er á leiðinni til Spánar í golf næstkomandi föstudag. Ég verð í 10 daga í sólinni og kem sólbrúnn og sætur tilbaka rétt fyrir kosningar og Eurovision.

Árgangur '78

2007-04-02T21:28:00.000Z

Ég get ekki neitað því að ég brosti út í annað þegar ég rakst á þessa mynd á netinu í kvöld. Þetta hafa greinilega verið ánægjulegir endurfundir hjá '78 árgangnum í Víkinni.

Froðudizkó

2007-03-29T00:59:00.000Z

Það verður boðið upp á "froðudiskótek" á skemmtistaðnum Vaxon í Bolungarvík um páskana. Ég fór á slíkt dizkó á Benidorm fyrir næstum 5 árum síðan, það var ágætis tilbreyting en ekkert sem maður sækist sérstaklega eftir.

Kók og Kristall

2007-03-29T00:22:00.000Z

Lengi vel var ég mjög hrifinn af svokölluðum cola-drykkjum. Sennilega var það koffeinið sem fékk mig til að halda að Kók væri bragðgott. Núna heyrir það til tíðinda að ég drekki Kók og hefur Kristallinn tekið við sem eftirlætis gosdrykkurinn. Fyrir nokkrum árum síðan hefði ég talið fásinnu að mér ætti eftir að þykja drykkir á borð við Kristal góðir. En tímarnir breytast og mennirnir með.

Eliza Wrona

2007-03-28T19:51:00.000Z

Mér að það sönn ánægja að bjóða upp á Eliza Wrona sem er nýjasta afurð hljómsveitarinnar Grjóthrun í Hólshreppi en sveitin er einmitt aðalnúmerið á rokkhátíðinni Aldrei fór ég suður í ár.

Mánuður í Islantilla

2007-03-27T21:34:00.000Z

Það er ekki nema mánuður í að ég haldi "heim" til Islantilla í mína árlegu golfferð. Það er mikið að gera hjá mér þessa dagana og ég hef ekki tíma til að láta mér hlakka til ferðarinnar.

Draumastarfið

2007-03-23T14:57:00.000Z

Atvinnumálin eru mér hugleikin þessa dagana. Af því tilefni datt mér í hug að leggja fyrir ykkur einfalda spurningu sem ég hvet ykkur til að svara með kommenti.

Við hvað vildir þú helst af öllu starfa - hvert er þitt draumastarf?

Enski boltinn og Sýn

2007-03-23T01:20:00.000Z

Ég skrifaði færslu um enska boltann og Sýn á Moggabloggið í dag. Það er víst nokkuð ljóst að enski boltinn verður ekki á Sýn næsta vestur heldur verður stofnuð ný sjónvarpsstöð um útsendingar frá enska boltanum. Ný stöð, ný áskrift. Ef þetta reynist rétt gæti svo farið að við Bolvíkingar sjáum ekki enska boltann næsta vetur... nema að Digital Ísland fari að bjóða upp á fleiri stöðvar á svæðinu en það mun víst þýða að setja þarf upp annan sendi til að geta sent út allar rásirnar. Lesa má meira um málið með því að smella hér.

vikari.blog.is

2007-03-20T20:25:00.000Z

Ég er farinn að halda aðeins framhjá Blogspot.com en viðhaldið kallast vikari.blog.is og er hluti af Moggablogginu. Ég er þó ekkert hættur hérna megin en áherslunar verða eitthvað breyttar. Það verður meira af leiðinlegu lesefni á vikari.blog.is heldur en hér - ég ætla sem sagt að reyna að vera skemmtilegur hérna megin. Hér verða færslurnar í styttri kantinum en hinum megin má alveg búast við löngum ritgerðum um málefni líðandi stundar. Sumt fær þó að birtast báðum megin.

Að lokum vil ég benda á að í gær setti ég fjórar bolvískar skjámyndir inn á Moggabloggið sem ykkur er frjálst að nota.

Heimilisstörfin

2007-03-18T22:23:00.000Z

Eftir að hafa þurft að dveljast heima í nokkra daga vegna veikinda var mér farið að leiðast að geta ekki gert eitthvað gagn. Ég tók mig því til og þreif húsið hátt og lágt um helgina og kórónaði dugnaðinn með því að baka köku í kvöld. Samt sem áður eru þetta einungis venjuleg störf húsmæðra, þeim finnst ekkert tiltökumál að sinna slíkum verkum dags daglega. Ég ber mikla virðingu fyrir húsmæðrum, þær eiga lof skilið fyrir ómælt vinnuframlag á heimilum þessa lands í gegnum tíðina.

Blogg á bb.is

2007-03-18T17:17:00.000Z

Á föstudaginn breytti bb.is um ham og ég verð að segja að ég er ánægður breytinguna, hún er til batnaðar. Eitt af því sem er nýtt á vefnum er yfirlit sérvalinna bloggsíða, svo er að handahófi valið eitt blogg til að prýða forsíðu bb.is og má segja að þar með bætist frjálsleg óábyrg skrif við hinar klassísku greinar sem birtast reglulega á bb.is. Einnig er nú hægt að setja inn blogg/athugasemdir við einstakar fréttir og greinar, það er eitthvað sem getur verið fróðlegt að fylgjast með hvernig verður notað í framtíðinni.

Ferðasaga í máli og myndum

2007-03-18T17:05:00.000Z

Á dögunum fór ég ásamt Grími Atlasyni bæjarstjóra Bolungarvíkur og Árna Kristjánssyni dósent við HÍ á leik Liverpool og Barcelona í Meistaradeild Evrópu í fótbolta. Ferðin var með eindæmum skemmtileg og hverrar krónu virði. Ég setti fáein orð á blað vegna ferðarinnar og má sjá afraksturinn í þessari myndasyrpu.

Skatturinn

2007-03-18T15:26:00.000Z

Ég skrifaði langa færslu um þjónustu skattsins en það virðist sem Blogspot vilji að ég sé stuttorður. Þannig fékk ég aðeins villuboð þegar ég vildi birta færsluna. Þess í stað setti ég færsluna inn á vikari.blog.is þar sem í lagi er að vera langorður ;-)

Vestfirðir

2007-03-15T14:18:00.000Z

Á dögunum rakst ég á bloggsíðu þar sem greinum, fréttum og bloggfærslum tengdum Vestfjörðum er safnað saman í einhvers konar tenglasafn. Þetta er ágætis viðbót við annað framboð á upplýsingum um okkar ágæta landsfjórðung.

Veikur

2007-03-15T14:12:00.000Z

Ég nældi mér í flensu í borg óttans í síðustu viku. Ég þóttist ætla að harka slappleikann af mér þegar ég kom vestur en það fór ekki betur en svo að ég lagðist í rúmið á þriðjudagskvöld... og ligg þar enn.

Ósiðir stjórnmálamanna

2007-03-13T00:51:00.000Z

Eitt af því sem maður verður vitni af í pólitísku starfi er að fólk á það til að skreyta sig með fjöðrum annarra. Á mannamáli þýðir það að fólk eignar sér verk annarra. Þetta er ósiður sem fer í taugarnar á mér enda sjá flestir í gegnum slíka tilburði. Einstaklingar sem eru gjarnir á slíkar skrautfjaðrasýningar skora því ekki hátt hjá mér.

Annar ósiður sem tíðkast í pólitík er að afneitum gamalla synda. Þarna bera sumir við gleymsku en aðrir velja þann kost að skipta um flokk stuttu fyrir kosningar. Í báðum tilfellum er fólk að reyna að afskrifa fortíðina - rétt eins og hún komi þeim ekki við þrátt fyrir að vera fullir þátttakendur í leiknum - í von um kjósendur gefi þeim nýja lífdaga. Ég kaupi ekki slíka pólitík, það er þó ekkert athugavert við að skoðanir stjórnmálamanna breytist með tíð og tíma en það má þó ekki verða þannig að maður haldi að þeir skipti oftar um stjórnmálaflokk en nærbuxur - slíkt er einfaldlega ótrúverðugt. En þetta með gleymskuna er auðvitað klassískt en ónefndur ráðherra notaði gleymskuna óspart á sínum tíma þegar óþægileg mál komu til umfjöllunar.

Listinn yfir ósiði stjórnmálamanna er lengri (ef til vill ótæmandi) en þetta en ég bæti við meiru síðar.

Holly Dolly

2007-03-13T00:42:00.000Z

Ég man eftir að hafa heyrt lagið um hana Dolly hjá Slavko á vaXon.is í haust... núna er það eitt af vinsælustu lögum landsins ef marka má Íslenska listann á FM957. Lagið er skemmtilegur polki sem er algjört heilalím og fæst einnig í 2007 Reggeaton útgáfu...

Sundkappinn

2007-03-13T00:29:00.000Z

Þegar fréttir birtust af því að karlmaður á fertugsaldri hefði stungið sér til sunds við Ósvör um helgina héldu einhverjir að þar hefði undirritaður verið á ferð. Ég verð að bera af mér allar sakir í þetta skiptið enda var ég staddur í borg óttans á sama tíma... þetta hefði þó verið það síðasta sem mér hefði dottið í hug að gera enda er ég nú ekki þekktur fyrir að stinga mér til sunds þar sem hitastigið er undir 20 gráðum á celsíus.

You'll Never Walk Alone

2007-03-07T19:06:00.000Z

Ég er kominn heim úr hreint frábærri ferð á Anfield. Svona var stemmningin á Anfield fimm mínútum áður en flautað var til leiks Liverpool og Barcelona í gærkvöld.... þetta var mögnuð stund. Meira um ferðina síðar.

Við förum á Anfield

2007-03-05T12:10:00.000Z

Seinnipartinn í dag leggjum við af stað til Englands til að sjá leik Liverpool og Barcelona í Meistaradeildinni í knattspyrnu. Grímur hefur séð um alla skipulagningu á ferðinni, það eina sem er ekki alveg komið á hreint eru úrslitin í sjálfum leiknum. Ég ætla að láta mér nægja að setja fram spá um úrslit, ég hef trú á að Liverpool vinni leikinn og ég vona að þetta verði skemmtilegur markaleikur þar sem glæsileg tilþrif verða í fyrirrúmi. Eitt er þó víst að stemmningin á Anfield verður mögnuð á morgun, sagt er að Evrópukvöldin í Liverpoolborg séu ógleymanleg upplifun - ég hlakka til morgundagsins.

Creeps

2007-03-03T16:19:00.000Z

Þetta er flottasta lagið í dag... hin danska Camille Jones og Fedde Le Grand remixið af The Creeps... ég er gjörsamlega með þetta á heilanum ;o)

Gúrkutíð

2007-03-01T20:44:00.000Z

"Í Bolungarvík búa flestir við Völusteinsstræti eða 83 . Fámennustu göturnar eru Grundarstígur og Kirkjuvegur þar búa tveir. "

Það er gúrkutíð hjá Ríkisútvarpinu á Ísafirði, ég hef þó lúmskt gaman af svona "useless information" og get sennilega slegið um mig einhvern daginn með því að segja að ég búi í fjölmennustu götunni í Bolungarvík.

Lazy Town

2007-03-01T01:38:00.000Z

Beatfreakz - Somebody's Watching Me

Rihanna - SOS

Aqua - Candyman

Superfreak

2007-03-01T01:16:00.000Z

Ég horfði á kvikmyndina "Little Miss Sunshine" um daginn og get ekki annað sagt en að hún hafi verið hin besta skemmtun. Gamli smellurinn Superfreak með Rick James spilar stórt hlutverk í myndinni eins og sjá má í þessu atriði. Annars er líka Beatfreakz myndbandið við Superfreak líka ótrúlega flott.

Lisa Ekdahl

2007-03-01T01:04:00.000Z

Á laugardaginn verður stórviðburður í tónlistarlífi Vestfirðinga en þá heldur sænska söngkonan Lisa Ekdahl tónleika í Víkurbæ í Bolungarvík. Það er orðið uppselt á tónleika hennar á Akureyri og örfáir miðar eru á lausu á tónleikana á NASA í Reykjavík. Ennþá eru lausir miðar í Víkurbæ en benda má áhugasömum á að tryggja sér miða í forsölu á midi.is.

Stórleikir

2007-03-01T00:08:00.000Z

Það eru tveir stórleikir framundan hjá mínum mönnum í Liverpool, fyrst er það grannaslagur við Man.Utd. í úrvalsdeildinni á laugardaginn og svo er það leikurinn við Barcelona í Meistaradeildinni á miðvikudaginn. Ég trúi því að ferðin mín á leikinn við Barcelona verði ógleymanleg því mér skilst að það sé aldrei betri stemmning á Anfield en einmitt á Evrópuleikjum sem þessum. Ég lofa myndum og ferðasögu þegar heim verður komið.

Bestu sætin

2007-02-23T00:32:00.000Z

Ég er strax farinn að telja niður dagana í leik Liverpool og Barcelona í Meistaradeildinni í knattspyrnu. Þriðjudaginn 6. mars næstkomandi verð ég staddur á Anfield í Liverpool ásamt tveimur góðum ferðafélögum sem eru líkt og ég gallharðir Poolarar. Við fengum sæti á besta stað, erum á 4. bekk í hólfi KK en það er fyrir miðjum velli. Nálægðin við leikmenn verður því mikil og alveg bókað að maður hefur góða myndavél með sér á leikinn. Þetta eru líklega bestu sætin sem hægt er að hugsa sér á fótboltaleik sem þessum.

Ólátabelgir

2007-02-21T21:52:00.000Z

Ólátabelgirnir Craig Bellamy og John Arne Riise afgreiddu Barcelona á Nou Camp í kvöld. Golfkylfur komu þar hvergi við sögu en ævintýrið í Portúgal varð e.t.v. til þess að rauðhærði Norðmaðurinn uppgötvaði að hann gat skorað með hægri fæti. Leiknum lauk sem sagt með 2-1 sigri Liverpool þannig að það bíður mín að öllum líkindum skemmtilegur leikur á Anfield eftir tæpar 2 vikur.

Flensa

2007-02-18T21:52:00.000Z

Ég hélt ég gæti sloppið enn einn veturinn við veikindi en svo er nú ekki. Stuttu eftir að ljóst varð að Eiríkur Hauksson hefði unnið forkeppni Eurovision fór maginn í mér að ókyrrast... og þið getið ímyndað ykkur framhaldið. Ekki ætla ég þó að kenna Eiríki eða Eurovision um slæmt heilsufar þessa helgina -og ekki er hægt að skella skuldinni á Bakkus í þetta skiptið - en vona hins vegar að ég verði orðinn hress í fyrramálið svo ég geti tekist á við hin hversdagslegu verkefni.

blog.is

2007-02-17T20:06:00.000Z

Það virðist sem annar hver maður sé kominn með blogg á www.blog.is Ég tryggði mér vikari.blog.is á sínum tíma en hef ekkert notað það að ráði hingað til, ef ég gefst einhvern tímann upp á Blogger og blogspot.com er aldrei að vita nema að ég setjist að á blog.is

Játningar

2007-02-17T19:28:00.000Z

Ég fjárfesti í The Confessions Tour DVD/CD disknum með Madonnu í dag. Það er skemmst frá því að segja að diskurinn er frábær enda er alltaf flott show í á tónleikum með poppdrottningunnni. Á tónleikunum er umdeilt atriði þar sem Madonna er krossfest á diskókrossi... mig minnir að kirkjunnar menn hafi viljað banna atriðið en mér fannst það bara flott.

Hryðjuverk

2007-02-15T17:46:00.000Z

Það var tekist á um hryðjuverkamenn á Alþingi í dag. Samkvæmt fréttum virðist sem ákveðnir þingmenn hafi endurskilgreint hugtakið “hryðjuverk” þannig að fíkniefnasmygl falli þar undir. Hingað til hafa hryðjuverk verið skilgreind sem “hver sú árás sem af ásetningi er beint gegn almennum borgurum til ógnunar sem framin er í þeim tilgangi að ná fram stjórnmálalegum, trúarlegum eða hugmyndafræðilegum markmiðum.” Ég efast hins vegar um að innflytjendur (smyglarar) fíkniefna fremji glæpi sína í slíkum tilgangi. Þarna er í besta falli farið frjálslega með orð sem lýsir slæmum verknaði. Með hliðsjón af framantöldu geri ég þá kröfu á alþingismenn að þeir þekki muninn á eplum og appelsínum þegar fjallað er um jafn alvarleg mál og hryðjuverk á þjóðþingi Íslendinga.

Ríkur

2007-02-13T17:14:00.000Z

Ég er ekki lengur fátækur ef marka má frétt Baggalúts um uppfærslu fátæktarmarka. Ég hef sem sagt látið undan vilja litla eyðslupúkans sem ásækir veskið mitt reglulega og hef fjárfest í nægilega stóru flatskjársjónvarpi. Það er ekki laust við að mér finnist ég vera orðinn ríkur núna.

Jarðgöng

2007-02-12T17:18:00.000Z

Samgönguráðherra kynnti í dag Samgönguáætlun fyrir árin 2007 til 2018. Þessi samgönguáætlun er mjög mikilvæg fyrir okkur Bolvíkinga en í henni er tryggð fjármögnun jarðganga milli Bolungarvíkur og Hnífsdals. Gert er ráð fyrir að farin verði svokölluð Skarfaskersleið en sú leið tryggir öryggi vegfarenda og styttir leiðina milli Bolungarvíkur og miðbæjar Ísafjarðar niður í 12 kílómetra. Við sjáum því fram á að geta keyrt milli þessara tveggja bæjarfélaga á um 10 mínútum og verið helming leiðarinnar undir "þaki" þar sem göngin sjálf ásamt vegskálum við gangnamunna verða rúmlega 5 kílómetrar. Búist er við að jarðgöngin verið fullbúin árið 2010 og munu þau kosta um 4,3 milljarða króna, þar af koma 3,7 milljarðar úr samgönguáætlun en 600 milljónir eru nú þegar tiltækar í verkið samkvæmt samþykkt ríkisstjórnar Íslands haustið 2005. Það er því hægt að ráðast í útboð um leið og hönnun jarðganganna verður lokið og standa vonir til þess að framkvæmdir hefjist strax í haust.

Ég er að sjálfsögðu mjög ánægður með að valin hafi verið besta leiðin sem hægt var að hugsa sér. Í mínum augum er þetta algjör draumalausn á samgöngumálum okkar Bolvíkinga. Það er líka ánægjulegt að hugsa til þess að það var fyrir tilstilli heimamanns að ráðamenn opnuðu augu sín fyrir Skarfaskersleiðinni. En fyrst og fremst sjáum við Bolvíkingar fram á bjartari tíma næstu árin, ég er þess fullviss að jarðgöngin muni færa okkar aukin tækifæri til þess að vaxa og dafna til framtíðar.

Crazy Town

2007-02-10T18:17:00.000Z

Haukur og Helga Vala kynntu villta drauma um Bolungarvík framtíðarinnar á íbúaþinginu í dag. Hugmyndin var kölluð "Crazy Town" og innihélt meðal annars frumleg not af bryggjublóminu Kristinu Logos og bolvískan sæðisbanka. Kynningin þeirra var frábær skemmtun og er greinilegt að Bolvíkinga skortir ekki hugmyndaflugið þessa dagana.

Anfield

2007-02-10T00:18:00.000Z

Það eru rúm 4 ár og 30 kíló síðan ég heimsótti Anfield síðast. Nú er orðið ljóst að ég er svo ljónheppinn að geta komist á leik Liverpool og Barcelona á Anfield í Meistaradeildinni 6. mars næstkopmandi. Ég hlakka mikið til og vænti hagstæðra úrslita fyrir hönd minna manna í Liverpool.

X-A

2007-02-08T01:10:00.000Z

Í dag er seinni kjördagur í kosningum til Stúdentaráðs Háskóla Íslands. Að þessu sinni geta stúdentar við Háskóla Íslands fengið öflugan Víkara í Stúdentaráð með því að kjósa Vöku, félag lýðræðissinnaðra stúdenta við Háskóla Íslands.

Heift

2007-02-07T01:46:00.000Z

"Nú virðist stefna í eitt sérkennilegasta framboð Íslandssögunnar. Það byggir ekki á neinum málefnaágreiningi, heldur miklu frekar óútskýrðri heift."

Þannig lýsir Sigurjón Þórðarson alþingismaður brotthvarfi Sverris Hermannssonar og Margrétar dóttur hans úr Frjálslynda flokknum og mögulegu sérframboði Margrétar í Alþingiskosningunum í vor. En það yrði þó ekki í fyrsta sinn sem sérframboð á Íslandi væri byggt á óútskýrðri heift.

Frjálst fall

2007-02-07T01:19:00.000Z

Ef marka má skoðanakönnun Blaðsins er fylgi sumra stjórnmálaflokka í svokölluðu frjálsu falli þessa dagana. Helstu tíðindin er þó að Sjálfstæðisflokkurinn bætir við sig fylgi og er farinn að nálgast 50% múrinn. Einnig virðast Vinstri Grænir vera að festa sig í sessi sem næst stærsti stjórnmálaflokkur landsins... samkvæmt skoðanakönnunum,

You'll Never Walk Alone

2007-02-07T01:14:00.000Z

Sigursælasta knattspyrnulið Englands fyrr og síðar, Liverpool, var selt amerískum auðkýfingum í dag og er kaupverðið talið vera um 63 milljarðar íslenskra króna. Ég vona að þessi eigendaskipti eigi eftir að verða til einhverra breytinga hjá félaginu, til dæmis væri allt í lagi að fá nýja auglýsingu framan á búninga félagsins - það er ekki eins og Liverpool hafi verið sigursælt með danska bjórauglýsingu framan á búningunum.

Grannaslagur

2007-02-02T21:12:00.000Z

Að gefnu tilefni er rétt að taka fram að þessi pistill fjallar um knattspyrnu en ekki einstaka íslenska stjórnmálamenn sem hugsanlega gætu verið nágrannar.

Á morgun eigast Liverpool og Everton við í ensku úrvalsdeildinni í knattspyrnu. Leikurinn fer fram á Anfield sem er heimavöllur míns ástkæra félags Liverpool og má að venju búast við fjörugum leik. Til að hita upp fyrir leikinn er tilvalið að rifja upp glæsileg tilþrif sem sést hafa í leikjum liðanna í gegnum tíðina.

Liðsmaður

2007-01-31T01:43:00.000Z

Stundum pæli ég í ótrúlegustu hlutum, í kvöld var það hugtakið "liðsmaður" sem var mér hugleikið. Ég veit ekki hvort þið kannist við þessa lýsingu en ég ætla samt sem áður að láta hana flakka.

Liðinu gengur illa og liðsmaðurinn kennir hinum í liðinu um slæman árangur en lítur ekki í eigin barm. Liðsmaðurinn hlýðir ekki fyrirliðanum, virðir ekki leikskipulagið og spilar bara sína eftirlætis stöðu. Liðsmaðurinn er með yfirlýsingar um að hann sé mikið betri en hinir í liðinu og að hann sé þar að auki í miklu uppáhaldi hjá stuðningsmönnum liðsins. Að lokum missir liðsmaðurinn sæti sitt í liðinu og fer í kjölfarið að leita að nýju lið.

En vill eitthvað lið taka við slíkum liðsmanni? Er slíkur liðsmaður líklegur til að skapa góða liðsheild? Er líklegt að slíkur liðsmaður geti skilað liðinu og stuðningsmönnum þess góðum árangri?

Strákarnir okkar

2007-01-31T01:05:00.000Z

Íslenska landsliðið í handbolta stóð sig með prýði gegn Dönum í 8 liða úrslitum heimsmeistaramótsins. Þrátt fyrir að strákarnir okkar hafi verið óheppnir að tapa á síðustu sekúndunum í framlengingunni voru þeir að sama skapi heppnir að ná að knýja fram framlenginuna.

Mér fannst gaman að heyra viðtalið við Snorra Stein Guðjónsson eftir leikinn þar sem fréttamaðurinn spurði hann að því hvort það hefði ekki verið ljós punktur í leiknum að hafa skorað 15 mörk. Snorri Steinn svaraði því að það væri enginn ljós punktur við leikinn, þeir hefðu tapað leiknum og það skipti engu máli hvort hann hefði skorað 15 eða 25 mörk, það dugði ekki til sigurs. Mér finnst þetta viðhorf lýsa miklum metnaði og mættu fleiri temja sér slíkan hugsunarhátt.

Áfengi á Alþingi

2007-01-30T02:26:00.000Z

Á morgun er 14. mál á dagskrá þingfundar á Alþingi frumvarp um breytingu á fyrirkomulagi smásöluverslunar með áfengi á Íslandi. Með frumvarpinu er lagt til að einkasala Áfengis- og tóbaksverslunar ríkisins með annað áfengi en sterkt áfengi verði aflögð en með sterku áfengi er yfirleitt átt við áfengi með meiri vínandastyrk en 22%. Sem sagt skref í átt að auknu frelsi í viðskiptum með löglega drykki sem hafa þá sérstöðu að innihalda alkóhól - en þó ekki í of miklu mæli. Frumvarpið hefur þrisvar áður verið lagt fram á Alþingi en hefur eins og gefur að skilja ekki enn hlotið afgreiðslu. Ég vona að þingmönnum beri gæfa til þess að afgreiða málið að þessu sinni.

Annir

2007-01-29T02:12:00.000Z

Ég hef haft lítinn tíma til að skrifa pistla eða fréttir á netið undanfarna 10 daga. Sumir sakna skrifa minna en aðrir eru fegnir að ég skuli þegja af og til. Það hefur þó mikið gerst í þjóðfélaginu síðustu daga og eflaust hefði ég getað sagt skoðanir mínar á öllu milli himins og jarðar á blogginu.

Ég hefði getað sagt margt fallegt um strákana okkar eftir sigurinn sæta á Frökkum en ég ætl að bíða með fallegu orðin þangað til við höfum unnið Danina í 8 liða úrslitum.

Frjálslyndi flokkurinn virðist geta fallið endalaust í áliti hjá mér, mislyndu þjóðernissinnuðu karlarnir sem óttast útlendinga eiga eftir að tapa á því að hafa hafnað Margréti Sverris sem varaformanni um helgina.

Eðalkratinn og Ísfirðingurinn Jón Baldvin Hannibalsson afskrifaði Samfylkinguna í Silfri Egils í dag, enda ekki nema von þar sem ISG er búin að koma flokknum niður fyrir fylgi VG samkvæmt skoðanakönnunum... mig minnir að síðasta könnun hafi sagt 18%...

Ríkisútvarpið er oðið opinbert hlutafélag og við munum sjá hin óskiljanlegu afnotagjöld hverfa innan tveggja ára. Mikið framfaramál þar á ferð sem mun án efa efla Ríkisútvarpið.

Samgönguáætlun verður lögð fyrir Alþingi á næstu dögum og þar fáum við að sjá hvaða leið verður farin í Bolungarvíkurgöngum (eða Óshlíðargöngum) og hvenær verður byrjað að grafa göngin. Ég veðja á Skarfaskersleiðina enda tel ég hana vera besta kostinn sem okkur Bolvíkinga.

Röggi pensill var um helgina útnefndur íþróttamaður ársins í Bolungarvík árið 2006, þetta er því annað árið í röð sem kylfingur úr Golfklúbbi Bolungarvíkur hlýtur þennan eftirsótta heiður. Ég óska Rögga innilega til hamingju með árangurinn.

Að síðustu, Vertinn á Kjallaranum er farinn að blogga. Ragna er frábær penni og pistlarnir hennar eru alltaf stórskemmtilegir.

Landsins forni fjandi

2007-01-28T20:36:00.000Z

Hafísinn lét sjá sig við Djúp í gær og hafa stakir ísjakar rekið á land hér í Bolungarvík. Enginn ísbjörn er þá sjáanlegur á götum bæjarins. Þó má finna einn frægan ísbjörn hér um slóðir en sá er hafður til sýnis á Náttúrugripasafni Bolungarvíkur.

Fótboltinn

2007-01-22T01:25:00.000Z

Ég veit ekki hvort ég á að þora að minnast á úrslit helgarinnar í fótboltanum, ég er í það minnsta ánægður með árangurinn hjá sjálfum mér í laugardagsboltanum.

Sleggjan

2007-01-18T00:46:00.000Z

Fyrir tæpum mánuði síðan fullyrti dyggur stuðningsmaður Kristins H Gunnarssonar við mig að Kristinn myndi ekki taka sæti á lista Framsóknarflokksins fyrir Alþingiskosningarnar í vor. Í dag kom tilkynning frá Kristni þar sem þau tíðindi voru staðfest.

Ákvörðun Kristins kemur mér ekki á óvart, hann tapaði prófkjörsslagnum um efsta sætið í kjördæminu og flestum er ljóst að skoðanir hans hafa í raun aldrei átt samleið með Framsóknarflokknum. Ég hef ekki trú á að Kristinn sé hættur í pólitík og ég geri ráð fyrir að hann hafi notað tímann frá því að úrslit prófkjörsins voru ljós til að leita fyrir sér á öðrum vígstöðvum og leggja línurnar nokkra leiki fram í tímann.

Kristinn er mjög klár maður og mun gera það sem tryggir eigin hag best.

Sagan segir að 2. sætið hjá Frjálslyndum sé laust og miðað við síðustu skoðanakannanir er líklegt að 2. sætið hjá Vinstri grænum sé öruggt þingsæti og sérframboð er ekki útilokað. Þá er gamla kjaftasagan um að Kristinn eigi eftir að setjast forstjórastól Tryggingarstofnunar ansi lífseig. Ég held reyndar að Kristinn vilji hætta í pólitík því mig grunar að þau stríð sem hann hefur háð undanfarin ár hafi verið erfið fyrir þá sem standa honum nærri. Ég held líka að kraftar Kristins myndu nýtast vel innan veggja Tryggingarstofnunar. En ef Kristinn á eftir að leita á önnur mið í stjórnmálum þykir mér ljóst að Sleggjan á eftir að hefna sín illilega á Framsóknarflokknum.

Mál málanna

2007-01-18T00:40:00.000Z

Umræður á kaffistofum og götuhornum í Bolungarvík snúast þessa dagana nær eingöngu um þorrablótið og hefðir og reglur því tengdu. Mér er ekki boðið í partýið eftirsótta og mér er svo sem slétt sama. Mér er ekki heldur boðið á árshátíð kvennfélagsins og ég er ekki velkominn í saumaklúbba bolvískra kvenna. En það virðist vera mikill pirringur í Bolvíkingum þessa dagana vegna þess að það er ekki öllum boðið á þá árvissu skemmtun sem er vinsælust í Víkinni.

Í gegnum tíðina hefur hið þjóðlega bolvíska þorrablót notið jákvæðrar umfjöllunar í fjölmiðlum en nú er svo komið að búið er að skemma hina góðu ímynd þorrablótsins. Utanaðkomandi aðilum finnst umgjörðin um þorrablótið áhugaverð. Klæðaburðurinn, trogin og skemmtiatriðin - bolvíska skaupið. Umræður um hvort hefðirnar og reglurnar séu sanngjarnar eru hins vegar þess eðlis að þær eiga aðeins heima hér á svæðinu. Það er ekkert unnið með að bera svona mál á borð fyrir alþjóð, fréttaflutningurinn hefur aðeins neikvæð áhrif á ímynd Bolungarvíkur. Við viljum byggja upp en þetta getur ekki kallast annað en að rífa niður.

Eftir mánuð verður annað merkilegt samkvæmi í Bolungarvík. Kúttmagakvöldið. Í gegnum tíðina hefur það verið karlakvöld en nú má líklega búast við að konur krefjist þess að fá aðgang að kúttmagakvöldinu í nafni réttlætis og sanngirni.

Vandamál

2007-01-16T01:46:00.000Z

Það fer fátt meira í taugarnar á mér en tal um vandamál. Í hugum margra eru vandamál neikvæð fyrirbrigði sem íþyngja fólki ef of mikið er einblínt á þau. Ég hef reynt að temja mér að líta á vandamál sem óleyst verkefni og hvert verkefni er hægt að leysa með góðum og farsælum hætti. Því getur einstaklingur sem er sagður glíma við mörg vandamál alveg eins hugsað að hann sé svo heppinn að fá að takast á við mörg krefjandi verkefni. Hugarfarið er þess vegna mikilvægt, með jákvæðu hugarfari getum við leyst vanda en neikvæðni leiðir sjaldan eitthvað gott af sér.

Þorrablót og hefðir

2007-01-16T01:37:00.000Z

Nú er kominn sá tími ársins þegar Íslendingar fara að blóta þorra. Að venju ríða Bolvíkingar á vaðið og halda sitt hefðbundna þorrablót á fyrsta laugardegi í Þorra. Eins og flestir vita hafa merkilegar hefðir fest sig í sessi á þessu fræga bolvíska þorrablóti en blótið er víst eitt það elsta sem um getur á Íslandi.

Blótið er haldið af bolvískum konum sem hafa veg og vanda af undirbúningi blótsins og skemmtiatriðum á sjálfu blótinu. Sú kvöð hvílir á þeim konum sem sækja blótið að þær þurfa að gefa kost á sér í skemmtinefnd á nokkurra ára fresti og leggja þar fram vinnu sína til að halda siðnum við. Þá koma blótsgestirnir sjálfir með mat og guðaveigar í trogum til blótsins en ekki er um að ræða þorrahlaðborð líkt og víða annars staðar.

En það geta ekki allir mætt á bolvíska þorrablótið því samkvæmt hefðinni bjóða konur bónda sínum til blótsins og er blótið ætlað hjónum, sambýlisfólki, ekkjum og ekklum í Bolungarvík. Þá verða konur að mæta í upphlut eða peysufötum og karlar í hátíðarbúningi eða dökkum jakkafötum með hálstau. Þarna eru sem sagt kröfur um hjúskaparstöðu, búsetu, klæðaburð og jafnvel kynhneigð sem takmarka þátttöku í þorrablótinu.

Menn eru ekki á einu máli um ágæti þessara reglna og finnst mörgum komi tími á að rýmka reglurnar þannig að fleirum gefist kostur á að taka þátt í þessum merka menningarviðburði. Af því tilefni setti ég inn könnun á www.vikari.is þar sem Bolvíkingum gefst kostur á að svara eftirfarandi spurningu: "Finnst þér sanngjarnt að einhleypu fólki sé meinaður aðgangur að þorrablóti Bolvíkinga?"

Undir áhrifum

2007-01-11T01:58:00.000Z

Síðastliðið ár hjá mér hefur að mörgu leyti markast af því að ákveðnir einstaklingar hafa reynt að breyta stjórnmálaskoðunum mínum. Ég hef tekið þessu fólki vel og hlustað á það sem það hefur haft fram að færa. Ólíkar og jafnvel andstæðar skoðanir hafa, þegar allt kemur til alls, haft jákvæð áhrif á mig og mótað betur skoðanir mínar á mönnum og málefnum. Ég tel mig vera betri mann fyrir vikið. Ég vil þakka þessu góða fólk - þið vitið hver þið eruð - fyrir mig, undir ykkar áhrifum hef ég vaxið og dafnað og náð lengra en ég þorði að vona.

Blaðamennska

2007-01-10T01:29:00.000Z

Ég er ekki blaðamaður en fylgist nokkuð vel með fjölmiðlum hér á landi. Ég get ekki fullyrt um hvað sé góð blaðamennska eða slæm blaðamennska. Hins vegar tel ég mig hafa nokkuð góða þekkingu á hvernig meta skuli tölulegar upplýsingar um ýmis mál, til dæmis skoðanakannanir.

Á dögunum rak ég augun í frétt á bb.is þar sem niðurstöður skoðanakönnunar um fylgi stjórnmálaflokka í Norðvesturkjördæmi voru tíundaðar. Þar kom fyrir þessi skemmtilega klausa:

"Samfylkingin mælist með 15%, líkt og fyrir mánuði síðan, en fyrir tveimur mánuðum mældist hún með 25%. Samfylkingin hlaut 23,2% fylgi í síðustu kosningum. Sjálfstæðisflokkur tapar þá miklu fylgi samkvæmt könnunum en bæði fyrir mánuði og tveimur mánuðum mældist hann með 35%, en nær nú aðeins 28%, sem er undir kjörfylgi en flokkurinn hlaut 29,6% atkvæða í síðustu alþingiskosningum."

Þarna þykir það sem sagt fréttnæmt að Sjálfstæðisflokkurinn hafi tapað 1,6 prósentustiga fylgi frá síðustu kosningum og er því slegið upp sem miklu fylgistapi. Samfylkingin tapar hins vegar 8,2 prósentustiga fylgi á sama tíma en það telst víst ekki mikið fylgistap á þeim bænum.

Í mínum huga er þessi frétt dæmi um slæma blaðamennsku og ég velti því einnig fyrir mér hvort blaðamaðurinn hafi skrifað fréttina litaður af eigin stjórnmálaskoðunum sem eru líklega nær Samfylkingunni en Sjálfstæðisflokknum.

Lisa Ekdahl

2007-01-10T01:18:00.000Z

Ég er búinn að kaupa mér miða á tónleikana með Lisu Ekdahl í Víkurbæ 3. mars næstkomandi. Það litla sem ég hef heyrt til þessarar söngkonu lofar góðu og ég hlakka til að sjá hana í Víkinni fögru í byrjun mars. Hægt er að kaupa miða á tónleikana í Víkurbæ - sem og hina tónleikana sem verða í Reykjavík og Akureyri á www.midi.is

Líf

2007-01-10T00:38:00.000Z

Helgi Seljan er með hugann við landsbyggðina og fjallar nú um þá mælistiku sem oft er notuð á lífið í þorpum landsins...

"Lengi vel hefur hin óopinbera mælistika á líf í þorpum úti á landi verið sú hversu margir sáust á ferli þar síðast þegar keyrt var í gegn."

Þetta er athyglisverð pæling. Ætli við getum ekki kveikt líf í bænum okkar með því að leggja bílunum og ganga á milli staða? Það er ekki eins og við þurfum á bílum hér að halda þar sem allt er í göngufæri.

Bolvísk fegurð

2007-01-09T22:07:00.000Z

Það er stundum fallegt á Ísafirði en sólarlagið gerir Bolungarvík að fallegasta stað í heimi.

Þrettándinn

2007-01-09T21:42:00.000Z

Við kveðjum jólin með álfagleði á þrettándanum. Slík álfagleði var hér í Bolungarvík á laugardaginn og þar var ég meðal áhorfenda. Hátíðarhöldin fóru vel fram þrátt fyrir kalt veður og flugeldasýningin var frábær.

Þegar ég var á barnsaldri þótti mér mikið til þess koma að fá að sjá Grýlu, Leppalúða, jólasveinana, skrattann, ljósálfa, púka og fleiri kynjaverur á álfagleðinni. Ég var hræddur við Grýlu og passaði upp á að haga mér vel svo ég ætti ekki á hættu að lenda í pokanum hennar, ég óttaðist skrattann og vildi ekki fyrir nokkurn mun flytja til heitra heimkynna hans í Helvíti og ég trúði því að jólasveinarnir færðu mér glaðning í skóinn fyrir jólin. En mér varð brugðið undir lok álfagleðinnar á laugardaginn þegar kynnir kvöldsins tilkynnti að bæjarstjórinn okkar hefði leikið skrattann og að bæjarstjórafrúin hefði verið í gervi Grýlu. Hvernig var þá með allar hina sem tóku þátt í álfagleðinni, var Leppalúði ekki þarna í eigin persónu? Hvað með jólasveinana?

Mér fannst þessi tilkynning kynnisins vera algjör óþarfi því þarna var verið að skemma saklausa trú barna á fyrirbæri á borð við jólasveina - ef skrattinn og Grýla voru leikin af fólki út í bæ er þá ekki nokkuð ljóst að jólasveinarnir voru það líka? Svo er það líka sérstakt að getið sé um suma leikendur í álfagleðinni en ekki aðra, verður hér eftir ætíð tekið fram hverjir verða í hlutverki Grýlu og skrattans eða verður aðeins getið um leikendur ef um opinberar persónur eða svokallað frægðarfólk er að ræða?

Krummaskuðin

2007-01-04T21:00:00.000Z

Ég datt inn á bloggið hjá Helga Seljan sjónvarpsmanni þar sem hann fjallar um heimsókn sína á æskuslóðirnar á Reyðarfirði en Reyðarfjörður var einmitt á dögunum útnefndur "mesta krummaskuð landsins" af Fréttablaðinu. Við Bolvíkingar fengum einnig okkar skammt af athygli í sama blaði og undirritaður sá sér ástæðu til að grínast aðeins með málið á sínum tíma. Sá pistill var líklega einn af mínum betri á síðasta ári og er því ekki úr vegi að birta hann hér aftur til upprifjunar.

Survivor: Bolungarvík

Forsjárhyggja

2007-01-04T20:59:00.000Z

Það var fjallað um forsjárhyggju í Speglinum á Rás 2 í dag. Tilefni umfjöllunarinnar voru sögusagnir um að einhverjir vel meinandi einstaklingar vilji setja flugeldaskotgleði Íslendinga á gamlárskvöld þröng mörk til að vernda öryggi almennra borgara. Í Speglinum komu fram mörg fáránleg dæmi um forsjárhyggju og var meðal annars sagt frá því að þriðjungur Svía vilji banna börnum yngri en 15 ára að horfa á fótbolta til að koma í veg fyrir að sænskir unglingar eigi eftir að gerast fótboltabullur. Í þættinum var einnig talað um þarna væri hreinlega um að ræða ýkta þörf fólks fyrir öryggi og að samfélagið væri í raun að búa til öryggisfíkla. En við þurfum víst frekar á ást og umhyggju að halda heldur en öryggi fyrir öllu mögulegu og ómögulegu sem getur valdið hættu í daglegu lífi. Við viljum frelsi í stað forsjárhyggju.

Fegurð Ísafjarðar

2007-01-04T01:04:00.000Z

Ég átti leið um nágrannabæjarfélagið Ísafjörð í byrjun vinnuvikunnar, þetta var á fallegum vetrarmorgni og var Pollurinn spegilsléttur þegar ég ók eftir Hraðbrautinni inn í Fjörð. Ég stóðst ekki freistinguna að horfa yfir Pollinn meðan á ökuferðinni stóð og virða fyrir mér fegurðina. Fjöllin spegluðust í Pollinum í fagurblárri birtunni. Ég vildi að ég hefði haft myndavélina meðferðis til að ná mynd af þessu fallega sjónarspili. Það er ekki laust við að ég öfundi þá Ísfirðinga sem hafa gott útsýni yfir Pollinn.

Skopskyn

2007-01-04T00:35:00.000Z

Í upphafi hvers árs fara fram miklar umræður um hvort tiltekinn árlegur sjónvarpsþáttur hafi verið skemmtilegur. Þarna er auðvitað átt við Áramótaskaupið sem virðist fara versnandi með árunum ef marka má ýmsar gagnrýnisraddir. Ég verð þó að viðurkenna að ég gat alveg hlegið að Skaupinu í ár líkt og áður - kannski er það góðu gáfnafari að þakka.

Skopskyn manna er mismunandi og er allt eins líklegt að það sem einum þykir fyndið, þyki öðrum vera algjörlega húmorslaust. Mér fannst til dæmis hjólastólaatriðið í Skaupinu vera mjög slappt en ég get hlegið mig máttlausann af öllum hjólastólaatriðunum með Andy og Lou í Little Britain þáttunum. Mestu máli skiptir - eins og Pétur læknir heldur fram - að fólk sé ekki kímniheft og geti fundið sér eitthvert aðhlátursefni. Það er til að mynda alltaf gaman að hlæja að óförum annarra og fréttir á borð við þessa geta óneitanlega kitlað hláturtaugarnar... ég verð nú samt að viðurkenna að ég bókstaflega grét úr hlátri við lestur fréttarinnar sem er svohljóðandi:

Þrekvaxin kona lokar helli

22 ferðamenn lokuðust inni í Cango-hellunum í Suður-Afríku þegar nokkuð breiðvaxin kona hrasaði á leið út um þröngan innganginn. Konan sat föst í tíu klukkustundir.

Meðal þeirra sem lokuðust inni, var sykursjúkur maður og tvö astmaveik börn. Björgunarmanni tókst að skríða yfir konuna með insúlín, vatn, súkkulaði og teppi meðan félagar hans reyndu að losa stífluna. Með því að smyrja konuna og klettana í kringum hana með matarolíu, tókst að lokum að draga hana út. Kostnaður við björgunina nemur sem svarar 400.000 íslenskum krónum.

Bolvíkingur ársins 2006

2006-12-31T18:38:00.000Z

Það virðist sem það þurfi alltaf að gera upp hvert ár með því að velja mann ársins. Það er búið að velja Íslending ársins af nokkrum aðilum og nú stendur yfir kjör á Vestfirðingi ársins. Það hefur enginnn (svo að ég viti til) staðið fyrir kjöri á Bolvíkingi ársins en það væri gaman að velta því upp hér hvort það væri ástæða til að velja Bolvíkingi ársins. Ef svarið væri játandi væri ekki úr vegi að koma með uppástungur um hver gæti hlotið þann heiður.

Þetta verða lokaorðin mín á blogginu á þessu ári. Góða skemmtun í kvöld og gangið hægt um gleiðinnar dyr.

Ég óska ykkur gleðilegs nýs árs og þakka fyrir það gamla.

Partýbærinn Bolungarvík

2006-12-31T18:21:00.000Z

Það er nóg um að vera í Víkinni í kvöld, áramótadansleikur á vaXon og Kjallarinn opinn. Það verður því hægt að fara á pöbbarölt í Bolungarvík á nýársnótt. Svo má að sjálfsögðu gera ráð fyrir gamlárspartýum úr um allan bæ.

Partýlög kvöldsins hjá mér eru meðal annars:

Eric Prydz vs. Pink Floyd - Proper Education (Another Brick In The Wall)
The Real Booty Babes - Since You Been Gone
Sugarbabes - Easy (Haji & Emanuel Mix)
Girls Aloud - Something Kinda Ooooh (Tony Lamezma Mix)
Scissor Sisters - I Don't Feel Like Dancing
Helena Paparizou - Mambo (Dancing DJs Remix)
Infernal - Self Control
Cascada - Everytime We Touch (Dancing DJs Remix)
David Guetta vs. The Egg - Love Don't Let Me Go
Justin Timberlake - My Love
Bob Sinclar - Rock This Party (Everybody Dance Now)
BassHunter - Boten Anna
Sharam - PATT (Party All The Time)
Mind Electric - Dirty Cash (Dirty South Remix)
Frisco vs. Ice MC - Think About The Way
Ultrabeat - I'm Not In Love
Marcel Woods - Advanced
Club Enforcer - Tutti Frutti
Dr. Mister & Mr. Handsome - Kokaloca
Musique vs. U2 - New Years Dub

Fótbolti

2006-12-31T02:10:00.000Z

Freydísarmótið í innanhússknattspyrnu fór fram í dag. Fyrir mótið hafði ég fengið sendar upplýsingar um mótið til að nota við fréttaskrif. Þar kom þetta meðal annars fram: "Kvennariðill ef næg þátttaka". Orðalagið í fréttinni minni vafðist aðeins fyrir mér, á endanum ákvað ég að nota orðið "kvennaflokkur" í stað "kvennariðills". Í fréttinni stóð að "ef næg þátttaka fæst verður einnig leikið í kvennaflokki". Ég er hræddur um að orðalagið "ef næg þátttaka fæst verður einnig keppt í kvennariðli" hefði getað orkað tvímælis og jafnvel þótt dónalegt.

Íslendingur ársins

2006-12-29T21:46:00.000Z

Tímaritið Ísafold valdi Ástu Lovísu Vilhjálmsdóttur Íslending ársins 2006. Ásta Lovísa er þrítug líkt og ég, hún er 3 barna móðir og glímir við arfgengan sjúkdóm sem er sagður ólæknandi. Hún berst fyrir lífi sínu þessa dagana og hefur gefið alþjóð kost á að fylgjast með baráttunni í gegnum bloggið sitt. Ásta Lovísa er sannkölluð hetja og er vel að þessari viðurkenningu komin.

Ég hvet ykkur til að lesa það sem Ásta Lovísa hefur fram að færa á blogginu sínu. Margt sem þar kemur fram fær mann til að hugsa um hve heppinn maður er að vera við fulla heilsu og að maður eigi að vera ánægður með það líf sem maður á í dag.

Hér að neðan má sjá tvö nýleg dæmi um hvað Ásta Lovísa segir á blogginu sínu.

"Aðfangadagur var æðislegur dagur. Enginn ástæða til að kvíða svona fyrir honum eins og ég var búinn að vera að gera . Krakkarnir voru fjörug enda aðfangadagur og mikið um að vera .... en þau voru samt svo yndisleg og það var virkilega gaman að hafa þau. Það var svo gaman að fylgjast með svipnum á þeim þegar þau réðust á pakkana sína. ..hehehehe.....Nú er aðfangadagur búinn og eftir að hafa verið með þeim þennan yndislega aðfangadag sannfærði mig um að reyna allt til að fá fleiri aðfangadaga með þeim. Ég bara skal !!!"

"Í dag förum við svo saman í jólaboð til Ingibjargar ömmu. Það verður án efa skrítið að fara þangað því afi er svo ný látinn og verður því örugglega hálf tómlegt að fara þangað. Fyrir einhverjum árum síðan var alltaf fullt af ættingjum í þessum jólaboðum á jóladag, en því miður þá er meiri hlutinn af ættinni minni látinn úr erfðasjúkdómnum sem er arfgeng heilablæðing. Blóð mamma mín lést úr honum þegar ég var að verða 8 ára og systir mín árið 2000."

Sósíalismi í Hólshreppi

2006-12-29T02:30:00.000Z

Mér sýnist að bæjarstjórinn sé búinn að kveða upp þann dóm að ég sé sósíalisti. Sumar frænkur mínar verða líklega glaðar að heyra það.

Ég á bb.is

2006-12-28T00:40:00.000Z

Það vildi svo skemmtilega til að það var vitnað í mig 2 sinnum á bb.is í dag, í fyrra skiptið var verið að fjalla um tillögu mínu um að börn fái frítt í Sundlaug Bolungarvíkur á næsta ári en í seinna skiptið var verið að segja frá kylfingum í jólagolfi.

Það hafa flestir hrósað mér fyrir að hafa komið fram með tillöguna um að börn fái frítt í sund en þó hafa örfáir gagnrýnt mig fyrir að vera með þessum hætti að skerða tekjur bæjarfélagsins. Mér finnst þess vegna rétt að geta þess að þegar ég lagði tillöguna fyrir bæjarstjórnarfundinn, lét ég fylgja með rökstuðning fyrir því að umrædd aðgerð þyrfti ekki að þýða tekjutap fyrir bæjarsjóð. Ég gerði sem sagt ráð fyrir að aðsókn barna og unglinga að sundlauginni myndi aukast ef frítt væri í sund og að það myndi einnig þýða að aðsókn fullorðinna myndi aukast því foreldra fylgja oft börnum í sund. Það kæmu því inn auknar tekjur vegna aukinnar aðsóknar.

Ég reiknaði einnig út mögulegan kostnað bæjarfélagsins af því að bjóða börnum og unglingum frítt í sund. Miðað við meðaltal aðsóknartalna sundlaugarinnar síðustu 3 árin getur tapið að hámarki orðið um 260 þúsund krónur - þetta á við ef aðsókn fullorðinna breytist ekkert. Til að finna núllpunkt, þ.e.a.s. þann punkt þar sem tekjur af aukinni aðsókn verða jafn háar kostnaðinum, er einfaldast að segja að það þurfi aðeins 3 fleiri fullorðna í sund á hverjum degi ársins til að hafa upp í kostnaðinn. Ef fleiri en 3 fullorðnir koma daglega í sund er bæjarfélagið að hagnast á öllu saman.

Í ljósi þessa fannst mér mjög eðlilegt að leggja til að börn yngri en 16 ára fái frían aðgang að Sundlaug Bolungarvíkur árið 2007.

Kalli í Kjallaranum

2006-12-28T00:32:00.000Z

Ég fékk þær ánægjulegu fréttir í dag að Kalli Hallgríms væri að spila í Kjallaranum næstkomandi föstudagskvöld. Þetta verður góð upphitun fyrir áramótin og ég vænti þess að það verði góð mæting og brjálað stuð í Víkinni á föstudaginn.

Ingólfsfjall

2006-12-26T06:14:00.000Z

Við strákarnir spiluðum Popppunkt og Trivial á Völusteinsstrætinu í kvöld. Ég stóð mig með mikilli prýði og tókst að merja sigur á Bigga Timberlake á hans heimavelli í Popppunkti... þar var það Village People sem gerði gæfumuninn. Trivialið gekk líka vel og vannst þar sigur í öðru af tveimur spilum... Ingólfsfjall segir allt sem segja þarf um það spil og sá sigur var ótrúlega sætur.

Jólin

2006-12-25T20:10:00.000Z

Það er eitt sem klikkar aldrei um jólin... maður étur yfir sig. Þrátt fyrir að vera fluttur að heiman hélt ég í þann sið að borða jólasteikina á Holtastígnum. Að loknu borðhaldi og hefðbundnum jólasiðum fjölskyldunnar hélt ég heim á Völusteinsstrætið og opnaði þar pakkana sem sjaldan hafa verið jafn margir og þetta árið. Fyrir jólin hafði ég búið til lítinn óskalista yfir jólagjafir, þessi listi var aðeins til í huga mér og samanstóð að atriðum á borð við Fanta Lemon og Lego. Mig vantar auðvitað Fanta Lemon út í ginið mitt en þetta með Lego-ið tilheyrir æskuminningunum. Aðfangadagskvöld var toppað með konungsættinni og ég verð að hrósa bakarameistaranum fyrir einstaklega vel heppnaða kökuskreytingu.

Gleðileg jól!

2006-12-24T18:15:00.000Z

Nú er jólahátíðin gengin í garð og ekki seinna vænna en að óska lesendum síðunnar gleðilegra jóla og farsældar á komandi ári. Einnig þakka ég öll kommentin á liðnu ári og vona að þau verði enn fleiri á því næsta. Undir þetta ritar ykkar einlægur... Baldur Smári Einarsson.

Meðfylgjandi myndir eru annars vegar af Hólskirkju í Bolungarvík og hins vegar sólarlagsmynd af Óshyrnu sem einhver ykkar hafa fengið inn um bréfalúguna síðustu daga.

Dauði Baldurs

2006-12-22T02:09:00.000Z

Það leynist ýmislegt á You Tube... til dæmis Dauði Baldurs

Sundið

2006-12-21T23:48:00.000Z

Ég eyddi megninu af deginum í fundarhöld en það voru þrír fundir á dagskránni hjá mér. Ég fór á fyrsta fundinn klukkan eitt í dag og fór heim af þeim síðasta klukkan hálf níu í kvöld. Á öðrum fundi dagsins kviknaði hjá mér hugmynd sem ég lét verða að veruleika á þeim síðasta.

Í fyrri umræðu um gjaldskrár Bolungarvíkurkaupstaðar fyrir árið 2007 lagði ég fram eftirfarandi tillögu um breytingu á gjaldskrá Íþróttamiðstöðvarinnar Árbæjar:

Sundlaug Bolungarvíkur fagnar 30 ára afmæli á næsta ári. Af því tilefni vilja bæjarfulltrúar Sjálfstæðisflokksins leggja til eftirfarandi breytingar á gjaldskrá Íþróttamiðstöðvarinnar Árbæjar.

Börn yngri en 16 ára fái frían aðgang að Sundlaug Bolungarvíkur árið 2007.

Skemmst er frá því að segja að tillögunni var mjög vel tekið af bæjarfulltrúum og bæjarstjóra og var samþykkt að vísa umræðum um gjaldskrár að minni tillögu meðtalinni til seinni umræðu sem verður í byrjun janúar.

Þessi tillaga mín er líklega af djarfara taginu fyrir sveitarfélag sem stendur höllum fæti fjárhagslega en ég hef fulla trú á að hún eigi eftir að hafa jákvæð áhrif á rekstur sundlaugarinnar til frambúðar.

Rétt er að minna á að nú um hátíðarnar er einmitt frítt í sund fyrir börn yngri en 16 ára og er því óhætt að hvetja Bolvíkinga og nágranna til að skella sér í sund um jólin.

Við þetta má bæta að í fyrri umræðu um fjárhagsáætlun ársins 2007 var samþykkt að leggja 15 milljónir króna til gerðar sundlaugargarðs sem mun meðal annars skarta vatnsrennibraut - kosningarennibrautinni víðfrægu.

4. deildin

2006-12-21T00:15:00.000Z

Golfsamband Íslands birti á dögunum mótaskrá sína fyrir árið 2007. Þar kemur meðal annars fram að 4. deildin fer fram á Tungudalsvelli á Ísafirði 10.-12. ágúst. Ég er að vonum ánægður með þessi tíðindi og er alveg ljóst að Golfklúbbur Bolungarvíkur mætir sterkur til leiks í Sveitakeppni GSÍ næsta sumar.

Veðrið

2006-12-18T23:43:00.000Z

Ef umræðuefni skortir má alltaf tala um veðrið. Í dag hefur veðrið farið í mínar fínustu taugar, rigning og rok með tilheyrandi hláku og hálku. Ef fram heldur sem horfir getum við e.t.v. skellt á jólamóti í golfi. Það væri líklega besta jólagjöfin sem hægt væri að hugsa sér, að komast í golf.

Karaoke

2006-12-16T13:37:00.000Z

Ég fór á stórskemmtilegt karaoke á Kjallaranum í gærkvöldi. Náði að drekka í mig kjark til að syngja tvö lög við mikinn fögnuð viðstaddra.

Tíðindi dagsins eru að ég sem DJ Kaztro verð að spila á vaXon í kvöld. Ég fæ mikið rýmri tíma en síðast og get þess vegna klárað að spila öll óskalögin frá því um daginn.

Fátækur

2006-12-15T01:34:00.000Z

Samkvæmt heimildum Baggalúts hafa fátæktarmörk á Íslandi verið uppfærð í 36 tommu flatskjá á heimili. Mitt 29 tommu gamaldags þykkskjársjónvarp gerir mig greinilega að fátæklingi. Það hlýtur því að vera kominn tími á að uppfæra þetta mjög svo lítið notaða heimilistæki.

Bolungarvíkurgöngin

2006-12-14T21:11:00.000Z

Síðastliðinn sólarhringur hefur að mestu leyti farið í fundahöld hjá mér. Þau fundahöld eru að mestu leyti vegna fyrirhugaðra jarðganga sem leysa eiga Óshlíðarveg af hólmi. Ég vil kalla þessi göng Bolungarvíkurgöng til að losna við Óshlíðar-nafnið.

Í dag var skýrsla Vegagerðarinnar um jarðgöng milli Bolungarvíkur og Ísafjarðar kynnt bæjarstjórnum Bolungarvíkur og Ísafjarðarbæjar á fundi í Ráðhúsi Bolungarvíkur. Í skýrslunni var gerð úttekt á 5 leiðum:

Tungudalsleið: Jarðgöng frá Reiðhjallavirkjun í Syðridal að Seljalandi við Skutulsfjörð.
Hnífsdalsleið: Jarðgöng frá nyrðri enda Syðridalsvatns til Hnífsdals með tilheyrandi vegalagningu yfir Syðridalsvatn og út sunnanverðan Hnífsdal.
Skarfaskersleið: Jarðgöng frá Ósi í Bolungarvík að Skarfaskeri í Hnífsdal
Seljadalsleið: Jarðgöng frá Ósi í Bolungarvík að utanverðum Seljadal á Óshlíð með vegskálum á innsta hluta Óshlíðar undir Búðahyrnu.
Óshlíðarleið: Tvenn jarðgöng á Óshlíð ásamt vegskálum á innsta hluta Óshlíðar undir Búðahyrnu.

Vegagerðin telur 3 leiðir vera mögulegar, þ.e. Hnífsdalsleið, Skarfaskersleið og Seljadalsleið. Bæjarráð Bolungarvíkur telur að tvær þessara leiða, Hnífsdalsleið og Skarfaskersleið, auk Tungudalsleiðar uppfylli þær öryggiskröfur sem lagt var upp með. Þá telur bæjarráðið að Skarfaskersleiðin og Tungudalsleiðin séu álitlegustu kostirnir sem kannaðir voru í skýrslunni.

Það er því ljóst að það verða gerð löng göng milli Bolungarvíkur og Ísafjarðar og er það auðvitað mikið fagnaðarefni fyrir okkur Bolvíkinga og nágranna okkar á Ísafirði og nágrenni.

Jólasveinarnir

2006-12-14T01:29:00.000Z

Ég er farinn að halda að jólasveinarnir séu ekki búnir að átta sig á því að ég er fluttur. Ef einhver úr fjölskyldu jólasveinanna er að lesa þetta blogg þá vil ég minna á að heimilisfangið er Völusteinsstræti 13 í Bolungarvík.

In the long run we are all dead

2006-12-14T01:13:00.000Z

Þrátt fyrir að ég hafi vitnað í Milton Friedman og verk hans undanfarið verð ég að viðurkenna að ég hef aldrei verið einlægur aðdáandi hans. Hins vegar hef ég notað ýmislegt sem Friedman hefur sagt til að öðlast betri skiling virkni hagkerfa og efnahagslífs. Ef ég á mér einhvern eftirlætis hagfræðing þá er það John Maynard Keynes sem hafði mikil áhrif á efnahagslíf heimsins á fyrri hluta 20. aldar.

Milton Friedman er eins mikill hægri maður og hugsast getur en Keynes telst hafi verið mikið nær miðju stjórnmálanna ef svo mætti að orði komast. Eitt af því sem Keynes er þekktur fyrir er að hann sagði að í kreppu væri gott að borga hópi manna til að moka skurð einn dag og fylla svo aftur upp í skurðinn næsta dag, til þess eins að koma peningum af stað. Reyndar taldi hann að vegagerð væri heppilegustu verkefnin til að veita fólki vinnu og auka peningaflæði um hagkerfið.

Þekktasta setningin sem eignuð er John Maynard Keynes er líklega "In the long run we are all dead".

Gagnrýni Mulligan

2006-12-13T23:23:00.000Z

Thomas Mulligan er einn af þeim sem hefur gagnrýnt afstöðu Milton Friedman til félagslegrar skyldu fyrirtækja. Mulligan telur að Friedman beiti m.a. rökvillum í grein sinni og nefnir í því tilliti að þegar Friedman skilgreini orðið "skattur" sé hann að beita rökvillu sem kölluð er óleyfileg endurskilgreining. Mullingan segir að skattur geti einungis verið það sem stjórnvöld leggja á og þvinga aðila til að greiða og eigi ekki við þegar stjórnandi fyrirtækis eyðir fjármunum fyrirtækisins og þar með hluthafa. Mullingan gagnrýnir einnig þá sýn sem Friedman hefur á stjórnendur fyrirtækja en Friedman stillir stjórnendum upp sem einförum sem hafi ekkert samráð við aðra aðila og geri allt upp á eigin spýtur. Þar telur Mulligan að Friedman beiti annari rökvillu sem er kölluð "strámaður" þar sem búið er til viðmið fyrir stjórnandann sem er þannig úr garði gert að auðvelt er að ráðast að honum og fella hann.

Þrátt fyrir að röksemdarfærsla Friedmans sé ekki gallalaus, þá hefur hún lifað af þá gagnrýni sem sett hefur verið fram á hana. Meginástæðan fyrir því er að á meðan enginn sýnir fram á að ríkisvald og dómsvald sinni ekki starfi sínu sem skyldi, þ.e. að setja fyrirtækjum lagaramma sem tryggir að félagsleg málefni séu ekki fótum troðin, er óþarfi sýna fram á að fyrirtæki hafi aðra félagslega skyldu en að hámarka hagnað sinn.

Félagsleg skylda fyrirtækja

2006-12-13T01:05:00.000Z

Spurningin um hver sé félagsleg ábyrgð eða félagsleg skylda fyrirtækja er ein þeirra spurninga sem komið hafa upp í umræðunni um grundvöll viðskiptasiðferðis. Milton Friedman hélt því fram að eina félagslega skylda fyrirtækja væri að hámarka hagnað sinn. Í gegnum tíðina hafa margir fræðimenn gagnrýnt afstöðu Friedmans til málsins en hann taldi sig þó aldrei knúinn til að svara þeirri gagnrýni því hann taldi að rök sín hefðu aldrei verið hrakin.

Þau rök sem Milton Friedman færði fyrir afstöðu sinni voru meðal annars að sjálf fyrirtækin gætu í sjálfu sér ekki haft félagslegar skyldur því slíkt væri aðeins persónum mögulegt. Einnig taldi hann að stjórnandi fyrirækis sem tæki á sig félagslegar skyldur væri um leið að vinna gegn bestu hagsmunum fyrirtækisins, þ.e. að vinna gegn hinu almenna markmiði fyrirtækja sem er að hámarka hagnað sinn. Friedman taldi einnig að þegar stjórnandi fyrirtækis tæki það upp hjá sjálfum sér að láta fyrirtækið leggja út í kostnað vegna félagslegra mála - umfram það sem lög kveða á um - væri hann í raun að skattleggja fyrirtækið, starfsmenn þess og eigendur.

Milton Friedman vildi að hið opinbera setti lög sem takmörkuðu athafnir fyrirtækja á ýmsum sviðum og taldi að fyrirtæki ættu að sjálfsögðu að fara að lögum og gangast við þeim skyldum sem þar eru lögð á fyrirtæki.Hins vegar taldi hann enga ástæðu fyrir stjórnendur fyrirtækja að fara út fyrir þann lagaramm til að vinna að félagslegum málum. Ríkisvald og dómsvald ættu að sjá til þess að lagararamminn væru nógu þröngur til að félagsleg mál yrðu ekki útundan.

Ekkert er ókeypis

2006-12-12T01:42:00.000Z

There's no such thing as a free launch

Þetta er ein frægasta setning hagfræðinnar og hún segir ótrúlega mikið. Sá sem mælti þessu fleygu orð hét Milton Friedman og var einn áhrifamesti hagfræðingur sögunnar. Í sjónvarpinu í kvöld var endursýndur 22 ára gamall sjónvarpsþáttur þar sem Milton Friedman átti í rökræðum við Ólaf Ragnar Grímsson, Birgi Björn Sigurjónsson og Stefán Ólafsson um hagfræði og stjórnmál. Þrír á móti einum. En það er skemmst frá því að segja að íslensku víkingarnir komust hvorki lönd né strönd gegn rúmlega sjötugum hagfræðingnum. Friedman var með þetta allt á hreinu og tók víkingana þrjá hreinlega í nefið.

Ég kynntist skrifum Milton Friedman strax á fyrsta ári í Háskóla Íslands þar sem ein ritgerða (greina) hans, The Social Responsibility of Business is to Increase its Profits, var notuð til kennslu í rökfræði og gagnrýnni hugsun. Í ritgerðinni glímir Friedman við þá spurningu hver sé félagsleg ábyrgð fyrirtækja og kemst að þeirri niðurstöðu að eina félagslega ábyrgð fyrirtækja sé að hámarka hagnað sinn. Hvað finnst ykkur um þetta, eruð þið sammála Friedman eða getið þið hrakið þau rök sem hann færir fyrir máli sínu?

Blá jól

2006-12-12T01:25:00.000Z

Í síðustu viku bárust fréttir af því að bæjaryfirvöld í Lepe á Spáni hafi fyrirskipað að þar yrðu hvít jól í ár. Þar sem ég er á leið á bæjarráðsfund í fyrramálið væri upplagt fyrir mig að leggja fram álíka tillögu hér í Bolungarvík, nema í minni tillögu yrði kveðið á um að jólin í Bolungarvík verði blá í ár.

En aftur að Lepe. Ég á góðar minningar frá Lepe, þar er til dæmis hinn frábæri kínverski veitingarstaður "Mandarin" sem bolvískir kylfingar þekkja af góðu einu... og eitt allra eftirminnilegasta næturbrölt lífs míns var einmitt í Lepe nú í vor. Þar kom Habinas diskótekið og langur göngutúr mikið við sögu.

Stúkuhúsið

2006-12-07T01:58:00.000Z

Stúkuhúsið var rifið í gær og þar með er eitt af baráttumálum mínum komið í höfn. Allt frá því á síðustu jólum þegar þakið fauk af Stúkuhúsinu og brak úr því skemmdi nærliggjandi hús, hef ég barist fyrir því að Stúkuhúsið yrði rifið. Þrátt fyrir að húsið hefði sögulegt gildi fyrir Bolungarvík þá taldi ég öryggi íbúa bæjarins vera mikilvægara. Hvaða gagn er annars af ónýtu húsi sem enginn vill hirða um og er þar að auki hættulegt umhverfinu?

903

2006-12-07T01:57:00.000Z

Samkvæmt óstaðfestum heimildum mínum töldust Bolvíkingar vera 903 talsins samkvæmt tölum Hagstofu Íslands 1. desember síðastliðinn. Við erum því aftur skriðin yfir 900 manna múrinn eftir að hafa farið ofan í 872 fyrir 2 mánuðum síðan. Það munar greinilega um Pólverjana sem fluttust hingað í haust.

Fyrst ég er farinn að minnast á innflytjendur í Bolungarvík þá er ekki úr vegi að rifja upp laugardagskvöldið á Vaxon þar sem haldið var diskótek. Það kvöld var líklega um helmingur gesta staðarins af erlendum uppruna. Og þessi erlendi helmingur var mikið áhugasamari um að skemmta sér heldur en Íslendingarnir sem sátu flestir við borð og drukku öl. Útlendingarnir voru sem sagt með mér og hinum vitleysingjunum á dansgólfinu.

Það var líka greinilegt að tónlistarsmekkur gesta staðarins var misjafn, útlendingarnir vildu dansa við nýlegs danstónlist en Íslendingarnir vildu helst gamla slagara, eitthvað íslensk - gamalt og gott. Stundum held ég að Íslendingar séu fastir í sveitaballamenningunni. Við þurfum hljómsveit á sviði sem spilar sömu lögin aftur og aftur, ár eftir ár.

Áfengispólitík

2006-12-05T20:16:00.000Z

Það voru skemmtilegar umræður á Alþingi í dag þar sem formaður Samfylkingarinnar líkti fylgi stjórnmálaflokka við alkóhólprósentu áfengra drykkja. Þar talaði ISG um að fylgi Framsóknarflokksins væri á pilsners-mörkunum. Samkvæmt sömu skilgreiningu er Samfylkingin í Norðvesturkjördæmi léttvín en Sjálfstæðisflokkurinn er í koníaksdeildinni. Það er ekki nema von að ég hrífist af sterkum drykkjum.

En annað leiðindamál tengt áfengi er hin fáránlega hækkun á áfengisgjaldi sem fjármálaráðherra boðar. Það er alltaf slæmt að hækka skatta, ekki síst þegar skattahækkunin á að bæta ríkissjóði upp tekjumissi af annarri skattalækkun. Hækkun áfengisgjalds á einungis eftir að verða til þess að verð bjórs og "ódýrs" léttvíns hækkar umtalsvert. Ódýrasta rauðvínið í Ríkinu hækkar um 200 krónur og bjórkassinn verður 700 krónum dýrari.

Einhverra hluta vegna virðist sem að íslenskir stjórnmálamenn hafa það að aðaláhugamáli að halda áfengisverði á Íslandi sem hæstu. Það má ekki afnema einokun ríkisins á einkasölu áfengis og lofa neytendum að njóta ávinnings frjálsrar samkeppni. Og það má ekki leyfa neytendum að njóta þess að virðisaukaskattur í veitingarekstri lækkar í 7%, þess í stað er áfengisgjald hækkað á móti svo sopinn með steikinni verði ekki of ódýr.

Tónlistarsmekkur

2006-12-04T01:26:00.000Z

Það hafa orðið frekar heitar umræður um tónlistarsmekk minn undanfarið. Það eru alltaf einhverjir sem setja sig á háan hest og segja að ég hafi lélegan tónlistarsmekk. Slíkt tal er ekkert nýtt af nálinni og ég er kominn með ansi harðan skráp gagnvart gagnrýni á tónlistarsmekk minn. En hvers vegna er tónlistarsmekkur mönnum svo heilagur að þeir geti jafnvel metið fólk af verðleikum af því hvaða tónlist það hlustar á?

Tónlistarsmekkur er aðeins huglægt mat hvers og eins á tónlist. Það sem einum finnst gott getur öðrum fundist slæmt. En svo framarlega sem tónlist veitir einhverjum ánægju þá er hún góð. En munum að smekkur manna er misjafn.

Metum við kannski líka fólk eftir því hvernig smekk það hefur fyrir mat? Er fólk sem fílar indverskan mat eitthvað verra en fólk sem elskar ítalska matargerð?

Það er talað um menn séu matvandir ef þeir borða ekki ákveðnar tegundir af mat, má ekki til sanns vegar færa að menn séu "tónvandir" ef þeir sneiða hjá vissum tónlistarstefnum?

Ég get viðurkennt að ég er matvandur en ég er alæta á tónlist. Ég fíla jafnt popp, klassík, rokk, house, trance eða hvað svo sem allar þessar tónlsitarstefnur heita. En ef það hægt að segja að það sé einhvað ákveðið einkenni á mínum tónlistarsmekk þá er það leitin eilífða að nýju efni, nýrri upplifun - framþróun.

Gærkvöldið

2006-12-03T23:10:00.000Z

Ég held að mér hafi tekist ágætlega til sem plötusnúður í gærkvöldi, ég náði a.m.k. að fylla dansgólfið og halda uppi einhverri stemningu. Ég hefði viljað spila lengur, 40 mínútur eru of stuttur tími fyrir mig. Ég byrjaði á rólegu jólalagi en þegar það fór að heyrast í "Bara í Viðarvatni" trylltist lýðurinn. Eftir Crazy, Kokaloca og Pink Floyd var ég búinn að fá salinn algjörlega á mitt band. Þurfti svo að víkja fyrir partýdýrinu að sunnan en kom svo aftur og spilaði Boney M fyrir stelpuna sem var greinilega mikið fyrir plötusnúða. Ég spilaði Total Eclipse Of The Heart fyrir Bjarna Pétur og að lokum Boten Anna fyrir ónafngreindan aðila.

Lagalistinn í heild sinni er svona:

Madonna - Santa Baby
Justin Timberlake - My Love
Gnarls Barkley - Crazy
Dr. Mister & Mr. Handsome - Kokaloca
Eric Prydz vs. Floyd - Proper Education
Till West & DJ Delicious - Same Man (Alex K Remix)
Lazard - Living On Video
Cascada - I Need A Miracle (SAD Remix)
Infernal - From Paris To Berlin
Cascada - Everytime We Touch (Styles & Breeze Remix)
- - -
Boney M - Megamix
Nicki French - Total Eclipse Of The Heart
BassHunter - Boten Anna

Helgarskammtur

2006-12-03T23:05:00.000Z

Þetta er í seinna lagi í þetta skiptið. Sitt lítið af hverju.

Dizko

2006-12-01T00:47:00.000Z

Ég hef ekki farið leynt með að ég mun rifja upp gamla plötusnúðstakta á vaXon.is á laugardagskvöldið. Þetta eru viss tímamót hjá mér því að það eru um 10 ár síðan ég kom fyrst fram á þessum ettvangi. Þá var ég að spila á skemmtistað sem hét Jón Bakan og var á þeim tíma einnig veitingarstaður. Það voru góðir tímar sem falla aldrei í gleymsku. Ég man að utan diskóteka þá spilaði maður á böllum með hljómsveitum á borð við Skítamóral, Sóldögg og Á móti sól, ég fæ gæsahúð þegar ég hugsa tilbaka til þessa tíma.

Í dag nota ég nafnið Kaztro þegar ég spila opinberlega, þetta er að sjálfsögðu skírskotun í Fidel Castro - segiði svo ekki að ég horfi eitthvað til vinstri í lífinu. Á menntaskólaárunum var ég kallaður DJ Base en meðan ég var á Jóni Bakan var ég bara kallaður DJ Baldur.

Á laugardaginn get ég lofað stanslausu stuði, hvort sem ég verð að spila ferskustu danstónslist samtímans eða gamla slagara sem aldrei klikka. Þið munið e.t.v. hvernig ég var í gamla daga en ég hef vaxið með hverjum degi og er núna í mínu besta formi. Eitt af þeim lögum sem ég mun koma til með að spila um helgina er My Love með Justin Timberlake... en það er hreinasta snilld

Óskalög eru vel þegin, ég tók við einu slíku á Kjallaranum á síðustu helgi og það lag verður spilað... ef þið hafið einhverjar sérstök óskalög þá mæli ég með að þið setjið þau í komment... nafnleysi er í lagi ef þið viljið ekki láta nafns ykkar getið.

Bæjarstjórn

2006-12-01T00:21:00.000Z

Það var bæjarstjórnarfundur hjá mér í dag, aldrei þessu vant var ekki lyftingatími hjá mér eftir fundinn og þýddi auðvitað aðeins eitt - ég tók til máls í tíma og ótíma. Þetta var að vissu leiti sögulegur fundur því þetta var í fyrsta sinn sem ég var ekki yngsti bæjarfulltrúinn í salnum, Jón frá Seljanesi mætti á sinn fyrsta bæjarstjórnarfund og það er ekki hægt að segja annað en að hann hafi átt góða frumraun. Ég veit ekki hvort það heyrðist í útsendingu frá fundinum en ég fékk hláturskast í miðri ræðu hjá Gunnari Halls þar sem hann talaði um klósettmál Náttúrugripasafns Bolungarvíkur, einhvern veginn komu orðin þannig út úr honum að hann teldi að nýtt klósett á náttúrugripasafninu væri sóknarfæri fyrir safnið... ég læt ykkur um að ímynda ykkur hverslags sóknarfæri það er.

Vegamál

2006-11-29T23:57:00.000Z

Ég var á fundi í kvöld þar sem vegamál voru rædd. Það var fróðlegur og fjörugur fundur. Ef þið viljið hitta sérfræðinga í vega- og jarðgangagerð þá skulið þið tala við Bolvíkinga. Næstum hver einasti Bolvíkingur telur sig vera sérfræðing í vegamálum, vandamálið er hins vegar að þessir sjálfskipuðu sérfræðingar eiga mjög erfitt að vera sammála um nokkurn skapaðan hlut. Meðal annars þess vegna verður líklega aldrei sátt um hvar Bolungarvíkurgöng eiga að liggja.

Survivor: Bolungarvík

2006-11-28T23:52:00.000Z

Sterkur orðrómur er um að innan skamms hefjist tökur á nýjum íslenskum raunveruleikasjónvarpsþætti. Þátturinn nefnist “Survivor: Bolungarvík” og munu þar 20 þekktar miðbæjarrottur glíma við erfiðasta verkefni lífs síns – búsetu í krummaskuði.

Stjórnandi þáttanna er sjálfur Dr. Gunni og verða þátttakendur í “Survivor: Bolungarvík” kynntir til sögunnar á síðum Fréttablaðsins áður en langt um líður. Þá hefur kyntröllið og tískulöggan Trausti 200 verið fenginn til að gefa álit sitt á væntanlegum þátttakendum.

Sagan segir að miðbæjarrotturnar muni dveljast í “brjáluðu blokkinni” meðan á tökum stendur og verður verkefni þeirra í þáttunum m.a. að koma sér í mannsæmandi vinnu og aðlagast hinum afskekkta bolvíska þjóðflokki. Vikulega munu áhorfendur fá að senda einn þátttakanda heim á malbikið en sú miðbæjarrotta sem lifir lengst af í fámenninu, fábreyttninni og doðanum fær sérstök verðlaun frá Samtökum landsbyggðarandstæðinga.

Miðbæjarrotturnar eru farnar að undirbúa sig undir förina í villta vestrið og hafa nokkrar þeirra m.a. sést taka strætó upp í Grafarvog til að komast í snertingu við lífið á landsbyggðinni. Einn þátttakandi hefur látið hafa það eftir sér að helst af öllu óttist hann af fá ekki hamborgara í Bolungarvík. Annar þátttakandi segist hafa lesið í Fréttablaðinu að það sé hættulegt að ferðast til Bolungarvíkur því þar sé furðufuglaflensa að ganga og að þar sé auðveldlega hægt að smitast af heilabilun.

Ekki er ljóst á hvaða sjónvarpsstöð “Survivor: Bolungarvík” verður tekinn til sýninga en orðið á götunni er að þessa stundina sé slegist um sýningaréttinn og er talað um að til samanburðar sé enski boltinn á góðu verði.

Blueboy

2006-11-27T22:30:00.000Z

Blái liturinn á hug minn og hjarta þessa dagana. Af því tilefni eru hér þrjú lög sem hafa eitthvað með bláa litinn að gera.

Eiffel 65 - Blue >> Algjör klassík
Orgy - Blue Monday >> Rokkuð New Order ábreiða
Blue Boy - Remember Me >> Mikið spilað á Jóni Bakan fyrir 10 árum síðan

Tækjabaninn

2006-11-27T21:59:00.000Z

Fyrir nokkrum árum fékk ég viðurnefnið "Teigabaninn" vegna þess að ég þótti fara illa með teigana á golfvellinum, var þá haft á orði að ég þyrfti að borga tvöfallt árgjald í golfklúbbinn til að standa straum af auknum viðhaldskostnaði golfvallarins.

Það kæmi mér ekkert á óvart ef forstöðumaður Árbæjar myndi krefja mig um tvöfallt gjald fyrir næsta árskort í ræktina eftir meðferð mínum á tækjum þreksalarins undanfarið. Fyrr í haust var það fótapressan sem gaf sig eftir átök mín og í dag gaf eitt spinninghjólanna upp öndina. Líklega verð ég hér eftir kallaður "Tækjabaninn".

Fouradi

2006-11-27T00:45:00.000Z